Terapiya nimadan boshlanadi?

Birinchi uchrashuvda nimalar bo‘ladi?

Salom, men Elchin Tolibov — klinik psixolog va psixoterapevt sifatida men har kuni turli yoshdagi, turli hayotiy tajribalarga ega insonlar bilan uchrashaman. Bu maqola hayotida ilk bor psixologga murojaat qilishni o‘ylayotgan yoki ilk seans oldidan biroz xavotirga tushgan insonlar uchun yozdim.

Terapiya — bu "tezda javob topish" emas. Bu sizni tinglash, tushunish va siz bilan birga yurish uchun ajratilgan makon. Har bir insonning ruhiy holati, hayoti va hislari o‘ziga xos. Shu sababli birinchi uchrashuvda hech narsani isbotlash yoki to‘g‘ri gapirish majburiyati yo‘q.
Seans boshlanishi bilan men sizni sokin va xavfsiz muhitda kutib olaman. Qulay kreslo, issiq choy yoki suv, hamda sizni shoshirmaydigan ohangda boshlanadigan suhbat kutadi. Bu uchrashuvda men sizdan siz haqingizda, hayotingizda nimalar bo‘layotganini eshitaman.
Siz hohlagan joydan boshlashingiz mumkin — bu og‘riq bo‘lishi mumkin, xavotirlar, yoki shunchaki “nimanidir tushunmaslik”. Har qanday his — bu terapiyada muhim.
Men sizni gapirtirishga emas, sizga gapirishga imkon yaratishga harakat qilaman.
Birinchi seansda siz meni kuzatasiz — men esa sizni tushunishga harakat qilaman. Men sizdan ko‘p savollar so‘rashim mumkin, lekin bu sizni sinash uchun emas, sizning ichki dunyoingizni yaxshiroq anglash uchun bo‘ladi.
Masalan:
  • “Yaqinda sizni nimalar ko‘proq qiynadi?”
  • “Bunday hislar sizga qachondan beri tanish?”
  • “Oldin yordam olganmisiz?”
Bular oddiy savollar ko‘rinsa-da, ular sizni ichingizdagi chuqur, ayni damda sizga og‘irlik qilayotgan tuyg‘ularga yaqinlashtiradi. Men sizni gapirtirishga emas, sizga gapirishga imkon yaratishga harakat qilaman.

Terapiyada his-tuyg‘ular muhim, lekin bu jarayon ham psixologik ilm-fan asoslariga tayangan bo‘ladi. Ba’zan sizga oddiy psixometrik testlar (masalan, Xavotir shkalasi, Depressiya ko‘rsatkichi, shaxsiy tipologiyalarni aniqlovchi so‘rovnomalar) berilishi mumkin. Bu testlar sizning hozirgi holatingizni yaxshiroq tushunish va terapiya rejasini tuzishda yordam beradi.

Shuningdek, men foydalanadigan yondashuvlar (masalan, Kognitiv-bixevioral terapiya, Sxema terapiya yoki EMDR) har biri ilmiy jihatdan isbotlangan, samarali metodlar hisoblanadi. Bu sizga shunchaki "gaplashib o'tirish" emas, balki yo‘nalishli va natijaga olib boruvchi jarayonda yaratish imkonini beradi.

Men sizga, shuni aytmoqchiman:

terapiya bu “bemorlar” uchun emas, ruhiy dunyosi ustida ishlashni istaganlar uchundir.

Agar hayotingizda ortiqcha yuk borligini sezayotgan bo‘lsangiz, yordam so‘rash — bu kuchsizlik emas, aksincha eng katta kuch belgisidir.


Sizga ushbu yo‘lda, ilm, tinglov va samimiyat bilan hamroh bo‘lish — men uchun ulkan mas’uliyat va sharafdir.

Elchin Tolibov
Klinik psixolog
Agar siz ushbu maqolani o‘qib terapiya haqida sal bo‘lsa-da, aniqlik his qilgan bo‘lsangiz — bu ilk qadamingiz allaqachon qo‘yildi degani.
Esingizda bo‘lsin, bu yo‘l yolg‘izlik emas.
Men sizni eshitishga va tushunishga tayyorman.
Qabulga yozilish
Ma'lumotlaringiz yetib kelishi bilan, siz orqali yozma tarzda aloqaga chiqamiz!
Shaxsiy ma'lumotlaringiz sir saqlanadi!